Am Mittwuch het den mi Schatz Geburtstag ka und isch scho 24 worde (alte Sack ;))! Am morge simmr schnell in Walmart go zmorge chaufe und den ine Museums-Park in Villahermosa. Döt hets so Mayachöpf und anderi Stei ka zum aluege. Mir sin relativ schnell döt dure glofe will die meiste Stei sowiso nüt richtigs dargstellt hän. Den simmr no chli dure zweite Teil vom Park glofe wos Tierli ka het. Döt hets au e Voliere ka wos Papageie und anderi Vögel drin ka het. Notürlich hets mi Fründ nit chönne loh im eine Vogel sis Grüsch noche zmach und prompt het dä uns den verfolgt und mir sin rächt schnell widr duse xi ;)

Den simmr widr ins Auto ghöcklet und richtig Tuxtla Gutierrez gfahre. Ufem Wäg simmr den vo Tabasco nach Chiapas, hän also nomol dr State gwächslet. In Chiapas isch es scho viil grüener und Hügeliger als inde Nördlichere States. Wo mer den in Tuxtla acho sin,  hämmr den e super schöns Hotel gnoh und sin no go Hemli shoppe füre Pascal. Zobe simmr den ine schnicke Restaurant go Znacht ässe. Mhmm so fein hämmr beidi scho lang nüm gässe ka :)