Do ich au mol no ha wele so Mayatempel go aluege (döt hani nonit gwüsst was indr 2. Wuche no alles uf mi zuechunnt) hani dr Pascal chönne überrede das mr nach Chichen Itza gön mit sonere Touri-Tour. Also simmr am Morge frieh abgholt worde und miteme Car richtig Chichen Itza gfahre. Ufem Wäg döt ane hämmr no halt binere Cenote gmacht und dr Pascal isch e paar mol wagemuetig drigumpt, ich Angsthas ha notürlich nur gfötelet und zuegluegt ;) den ischs au scho witer gange ine Restaurant go zMittag esse. Das isch e richtigi Masseabfertigung xi, will alli Touristebüs döt ane sin und s so Buffet gäh het. Es isch richtig grussig xi..

Den simmr den ändlich bide Tempel acho und es het grägnet wie us Chübel. Abr mir sin alli rächt froh xi, so ischs wenigstens erträglich xi die "Steihüfe" azluege. Unserer Füehrerin hani leider fast nit zueglost willi so berschäftigt xi bi mit Föteli mache, luege das mini tolle Rägepelerine nit zfest an mir chläbt und Moscitos verjage. Trotzdem hanis sehr idrücklich gfunde!

Zobe simmr den mied und völlig durchnäst widr heimgfahre und hän das Geld wo mer für die Tour usgäh hän mit gratis Getränk widr inegholt ;)