Frieh am morge hämmr ufmiese das mr au rächtzitig chönne s Auto in NY abgäh. Nochere 2 Stündige Fahrt und Stau im Lincoln Tunnel simmr den zrugg in Big Apple xi. Schnell ins Hostel gos Gepäck abgäh und den ischs au scho witer gange go d Freiheitsstatue vo witem aluege. Leider isch si sooo wit wäg xi das mr keini wirklich guete Föteli hän chönne schiesse. Uf dr Wunsch vo dr Nadsh simmr den chli uf dr Brooklyn Bridge umeglofe und aschliessend durch SOHO und Little Italy gsteift. Gege Obe hämmr den no e Abstächer ins Museum of Modern Art gmacht wo dr Itritt gratis xi isch. Es het sehr vil bekannti Bilder und Designer Möbel ect. Wo mer zrugg ins Hostel sin het me uns mitteilt das mr upgraded worde sin will mr sunst nit zäme im Zimmer xi wäre. Also hämmr e Private Room becho mit eigenem Bad und Doppelbett. Es isch herrlich xi widrmol ineme gschlossene Zimmer zübernachte wo me e eigeni Duschi het. Znacht hämmr bimene chleine Franzos ka wo mer abr eländlang ufs Esse hän miese warte. Zobe simmr no chli im Zimmer umeghange und den ab ind Federe.