So s lang erwartete Abentür het hüt agfange. Ich sitz grad im Flugzüg richtig New York und in mim Chopf kreise d Gedanke. Am Fritig hani mit de ängste Kollege nomol e chleine Grillobe gmacht. Und gestr im Pub hets den gheisse Abschied näh. D Träne sin den nonig gflosse, ich has gar nit chönne realisiere das ich wirklich gang. Doch hüt am morge woni s letschtmol für 11 Wuche bi bim Fründ inde Ärm ufgwache bi, sin den doch no e paar Abschiedsträne gflosse. Mini Eltere hän mi den ufe Flughafe Züri gfahre und noch etliche Sicherheitsfroge bezüglich mim Gepäck und sim Inhalt hani den ändlich i checkt. Noch e paar witere Tränli bim Abschied vom Mami und Papi, hani den durd Passkontrolle und dr Zoll chönne. Als ich am Gate acho bi, hän si mi per Zuefallsprinzip usgwählt und ich ha nomol miese die ganzi Täsche ufe Kopf stelle..Abr i has den schlussändlich au no ins Flugzüg gschafft. Drfür hani 2 Plätz am Fänster für mi elei J

D Vorfreud uf d Nadsh und Cathy stiegt mit jeder Minute, i will eifach nur no acho und im Hostel si.

Woni den am JFK acho bi, hani 1.5 Stund miese astoh fürd Immigration. Woni den ändlich vorne xi bi, hän die mir doch tatsächlich gseit dasi so 2 Fötzel usfülle dasi durechum. Also hani nomol dörfe zrugg go, go das Zügs uffülle..Noch 2 Stund has den au ich zum Gepäck gschafft. I ha mi den ufd Suechi noch eme Taxi gmacht und widr e eländ langi Schlange ufgfunde wo me het miese astoh. Plötzlich het öpis in minere Täsche ganz komisch klinglet..und d Nadsh und d Cathy hän m ruf mis Aminatel (danke mo) aglüte J noch ere guet halb Stund im Taxi bini den im Hostel acho wo die andere au scho uf mi gwartet hän. Mir sin den schnell ins Zimmer und den ab in Central Park. Es isch do eifach alles soo riesig und völlig Fremdi mache dr eifach Komplimänt uf dr Stross. Mir din den witer ufs Rockefeller und hän über ganz Manhatten gseh. Nochdem mr alli unseri Touristeföteli gmacht hän simmr ufd Suechi nocheme Restaurant gange. Mir hän den e cooll gfunde und au richtig fein gspiesse. Aschliessend simmr den no dr Times Square go aluege, das isch eifach fantastisch döt!! Den simmr den ab ind Heia go schlöfele.