Am Donnstig Znacht bini ganz eleige mitem Greyhound (das isch sone Reisebus) am Viertel vor 1 indr Nacht vo Santa Barbara nach San Francisco gfahre. Woni am Morge den ändlich nochere seehr unbequeme Nacht acho bi, hani grad zerst mol dr Aschlussbus vo Oakland nach San Francisco verpasst. Gott sei Dank isch dä den abr am halbi 11i au ändlich cho..Bi den zerst go Zmorge ässe und mis Gepäck ins Hostel due und ha mi den uf mini Entdeckigstour gmacht. Ha zerst s Cable Car gnoh bis and Fisherman`s Warf und bi den döt chli umeglofe und ha Föteli gmacht. Am Pier 39 hani den z Mittag gässe (Suppe im Brot) und döt relativ interessanti Sache entdeckt: zum Bispiel hets e Restaurant wo heisst Swiss Louis und unterem Titel stoht Italian and Seafood Restaurant ;) und den hani no e Linkshänderlade gfunde :)

Woni mi Sattgseh ha, bini den mitem Bus bis ufe Coint Tower vo wo me die ganzi Stadt gseht, es het au nur gaanz wenig Näbel ka über dr Golden Gate.

Aschliessend hani mi ufgmacht richtig Ferry Building, döt hets so Delikatesseläde und ich ha e riiiese Stück Gruyere gseh und ha widrmol soo Freud ka ;) (ich vermiss Chäs soo..)

Nochere churze Shoppingtour sin den au scho mini Kollege acho und mir sin zäme ufs Pier 39 go Fisch ässe. Den hets gheisse ab ins grüsslige Bett im nit allzu suberste Hostel..

Am nächste Morge simmr neu gstärkt (abr immrno dränkig will d Duschi uns so gruusst het..) ins IHOP go zmorge ässe und den die beriehmti Kurverstross durab gfahre. Den ischs für mi au scho Zit xi zum ufe Zug zgo richtig Menlo Park. Wo mini besti Fründin au scho uf mi gwartet het. Si isch sitem August 2010 Aupair do und het mir chli ihri Wält zeigt. Mir sin zerst grad mol in sone riiiese Ichaufslade gange wome nur mit sonere Charte cha öpis chaufe. Me cha au nit nur ei Bagel chaufe, me muess grad 12 chaufe ;) und döt hets mega vil Probierständ ka und wo mr widr use cho sin, simmr satt xi bis zobe ;)

Zobe simmr go chinesisch ässe und den ins Autokino. Isch ächt super xi mol so richtig Amerikanisch ins Kino zgo. Am Samstig simmr den an sone chleine See und go Zmittag ässe und zobe hämmr grilliert und sin go Bowle. Am Sunntig nocheme Zmorge und ere chleine Tour durch d Stanford University hets den au scho widr gheisse Abschied näh (dismol nur no für e paar Wuche den simmr beidi widr deheim).