Nochdem mr e churzi Nacht bi de Couchsurfer ka hän, will mr no rächt lang gspielt hän mit ihne, hemmer uns den ufgrafft und sin Richtig Harvard University gfahre. Döt hämmr den im IHOP (International House of Pancakes) zmörgelet und ich mini erste richtige amerikanische Pancakes und mi erste „egg sunny side up“ ka. Nochane simmr den dr Campus vo Harvard go aluege, es gseht wirklich so us wie me sich das vorstellt und mes immer inde Film gseht. Im Chinatown hämmr den z Mittag gesse und sin den ind Shoppingstoss chli go lädele. Nocheme stärkende Kaffi vom Starbucks simmr den widr zu de Couchsurfer und den ine italienischs Restaurant go esse. Zobe hämmr nüt me gross gmacht will mr alli mega kaputt xi sin.

Momentan isch das grosse Amerika no chli überforderend für mi. Die komplizierte Bstellige inde Takeaway Restaurants und d komische Esse indr Charte vode normale Restaurants verwirre mi no e chli. Die komischte Sache wo mer bis jetzt am meiste ufgfalle sin, sin das d Amis eim eifach uf dr offene Stross Komplimänt mache und Lüt eim aquatsche wo me gar nit kennt. Userdem hupe d Autos do wen me si abschliesst, so das ich jedesmol verschrick weni übere Parkplatz lauf ;) es isch au komisch widr minderjährig zsi obwohl me scho 20 isch. Abr an die Sache wirdi mi au no gwöhne.