Wo mer erfahre hän , dass mr e verlängerets Weekend hän, isch für uns klar xi, dass mr widr e Trip mache J dasmol isches nach SAN DIEGO gange!! D Livia und ich hän uns am Fritig morge e Auto gmietet und sin uf nach San Diego gfahre. Noch e paar mol verfahre (mir hän uns erstmol ans Navi und die amerikanische Strosse miese gwöhne), simmr den am spötere Nomitag in unserem Hostel acho. Mir hän den unbedingt wele go Hangover 2 luege und hän uns ufe Wäg richtig Downtown gmacht zum Tickets hole. Um uns s warte zverchürze hämmr uns mitem Kolleg vo dr Schuel troffe, wo jetzt in San Diego ind Schuel goht. Nacheme leckere Lemonade (mis neue Lieblingsgetränk sitti widr minderjährig bi) ischs den ins Kino gange. Noch dem asträngende Dag simmr todmied ins Hochbett (mit no 4 andere im Zimmer..irgendwo miemer jo spare ;)) gfalle.

Am Samstig hämmr den unsers volle Programm vo jegliche Pärks gstartet. S Seaworld isch zerst ufem Plan gstande. Es isch ächt super xi abr au sehr asträngend, darum hämmr zobe nur no öpis Chleins gässe am Ocean Beach und uns den schlofe glegt.

Am Sunntig simmr den in Zoo, dä isch ächt riesig und me muess mega wit laufe zum alles gseh. Abr mir hän fründlicherwis Unterstützig vom Rob ka (mir hän ihn bim Tigerchäfig kenneglernt und är het e Johrescharte sit 10 Joor vo dem Zoo, darum het är uns alles interessante chönne zeige). Zobe simmr den in sone crazy Restaurant namens Dicks gange mit 8 Kollege (zum Teil vo dr Schuel und zum Teil Kollege vo Kollege). Isch ächt e witzige Obe xi J

Am Mäntig simmr den mit 2 Kollege in Wild Animal Park. Für uns ischs nüm so spannend xi wills vil Tier het wos au im Zoo scho ka het abr isch trotzdem lustig xi. Spöter simmr den no e paar Beaches go aluege. Unteranderem dr beriehmti Coronado Beach und La Jolla mit de Seeleue.

Am Zistig hämmr uns den, nochdem mr unsere Stritt mit em Navi erfolgrich beändet hän unds widr das gmacht het was mir hän wele, ufe Heimwäg gmacht. Dr Trip isch ächt super xi abr i ha den mini Tierli gseh füre Zitli ;)