Am morge sind Nadsh und ich uf sone 2 Stündigi Bootstour entlang dr Küste vo Manhatten gange. Es isch super toll xi, mir sin gaanz noch andr Freiheitsstatue verbi gfahre und so hani si doch no vo nochem gseh. Userdem het me super guet chönne d Skyline und d Brucke fötele. Den hämmr au glernt werums Big Apple heisst: d Musiker sin friener umegreist und hä gluegt wo si mit ihrer Musik am meiste Gäld verdiene und das isch NY xi. Für Gäld hän sis Codewort Sugar benutzt und will dr Öpfel die Frucht mit am meiste Fruchtzucker isch hän si NY Big Apple gseit.

Am Nomitag simmr übere nach Brooklyn gfahre, hän gässe und am Ufer übere nach Manhatten gseh. Mir sin den gli mol zrugg ins Hostel go unser neus Zimmer bezieh wo mer leider nüm alli zäme hän chönne in eim Room si..drfür simmr widr upgraded worde ine höcheri Prisklass abr leider hämmr kei Bad im Zimmer ka. Zobe simmr den no go Karibisch ässe, d Nadsh und ich hän uns e Paella teilt und nochane simmr au scho bald mol ins Bett.

Die Wuche mit de Mädels isch super xi. Si hän mr dr Istieg in das riesige Land mit soo viele Sache wo anderst sin sehr erliechtert. Ich ha die Wuche sehr viel Idrück gsammlet und so viel gseh. Nadsh und Cathy danke für die Wuche!! Und danke für euri Hilf dasi mi do einigermasse zrächt find und nüm so ufgschmiesse bi!