Nach einere Wuche Playa del Carmen hämmr e chleins Auto gmietet und sin mit unserem ganze Bagage (user eim Koffer wo mer hän chönne bim Pascal sinere ehemalige Lehrerin loh) los gfahre. Vo Playa simmr richtig Rio Lagartos gfahre. Das isch sone Lagune wos meeega vil Flamingos het. Döt hämmr den e Bootsfahrt gmacht zum d Flamingos vo nochem go aluege. Die Vögel sin ächt dr Hit, mit ihrer Farb und ihrer komische Körperform sehn si richtig fancy us ;)

Nocheme chleine Zmittag inere Dorfbeiz vo döt, simmer den witer richtig Merida gfahre wo mer unseri ersti Nacht iplant ka hän. Wo mer abr döt bi dem Hotel wo mer reserviert und zahlt ka hän acho sin, hets gheisse si heige nüt becho. Also hän mir miese dr Voucher ihne irgendwie schicke und si hän uns den ine anders Hotel verleiht. Döt hani d Schwizzer Zueverlässigkeit grad richtig fest vermisst. 

Zobe simmr no go ässe und chli übere Märt vo Merida glofe und den gli mol go pfuuse will uns am nächste Dag e langi Fahrt bevor gstande isch.