Am Morge schnell go zmörgele und scho ischs wieder witer gange. Unsers Usflugsziel für dä Dag het Canon del Sumidero gheisse - e Fluss wo umgäh vo 2000 m hoche Felse isch und immer änger wird. Döt acho hämmr den e 2,5 Stündigi Bootstour gmacht. Es isch wirklich super schön xi und sehr idrücklich wie die Felswänd usem Wasser in Himmel empor rage. Dr Füehrer ufem Boot het viel verzellt abr soo schnell uf Spanisch, dass nit mol dr Pascal öpis verstande het.

Am Nomitag simmr den witer und witer gfahre und wo mer an unserem Tagesziel acho sin, hämmr scho chli blöd us dr Wösch gluegt. In dem chleine härzige Dörfli sin alli Lüt mit Händsche, Chappe und dicke Jackene umeglofe. Wo mir in unserne summerliche Tenus usgstiege sin, hämmrs zum erste mol sit mr in Mexico sin erträglich gfunde duse ;) es het öbe 23 Grad ka, für uns also eigentlich warm..mir hän den mol googlet wie wit obe mir sin und hän mit Schock miese feststelle, dass mr uf 2100 m.ü.M sin. Mit däm hämmr ehrlich nit grechnet abr uns sin die Temperature jo grad rächt xi :) mir hän den e Schlofplatz inere chleine Jugendherbärge gfunde ( zu 2. hämmr e 6er Zimmer dörfe ha) und sin den go italienisch ässe. Mir sin den no übere Märt gschlenderet und chli go lädele. Das Dörfli isch definitiv unsere Favorit vo unserer Reis.