Am Morge frieh simmr us unserem Bungalow kroche und hän die 60 Kilometer bis zum Mayatempel uf uns gnoh. Es isch e kurverichi, eispurigi Strecki xi und nochere Stund hämmrs gschafft. Calakmul isch e ziemlich neu entdeckti Mayastätte, so dases nonig so viel Touriste het. Mir hän den zerstmol e gueti halb Stund miese in Dschungle ine laufe, bis mr die erste Steihüfe gseh hän. Nochere witere Stund umeirre hämmr den au ändlich die grosse Pyramide gfunde. 45m steil duruf ohni Zmorge im Buch und mit eim Fläschli Wasser. Mir häns abr trotzdem gschafft und dr Usblick isch atemberaubend xi. Me het eifach nur Urwald gseh, kei Zivilisation oder ähnlichs. Die Mayastätte het mr definitiv am beste gfalle :)

Nochdem mr widr zrugg bim Auto xi sin, hämmr uns widr ufe Wäg gmacht usem Dschungle. Leider hämmr immer no nüt zässe ka und es isch scho Mittagszit xi. Also simmr gfahre und gfahre und wo die erste Dörfli cho sin, hämmr miese feststelle, dass mr nur no umgrächnet 6 Franke hän will mr gestr kei Gäld meh sin go useloh. Do mer nit gwüsst hän wie langs no goht bis dr nächsti Bankomat finde, hämmr das Gäld au nit für Esse chönne usgäh, do mer vilicht no hätte miese tanke. Am 1 oder 2 am Nomitag simmr den ändlich ine grösseri Stadt cho und hän chönne Gäld useloh und öbis zMittag ässe. Mir hän den schnell inere Taqueria aghalte, wos so Sandwich gäh het. Aber s Fleisch isch sooo wiederlich xi, das mrs halbe Sandwich wäg gheit hän und gar kei Hunger meh ka hän..

Noch e paar witere Stund Autofahrt simmr den in Tulum acho. Unsers letschte Ziel uf unserer Reis. Döt hämmr ziemlich billig chönne e Bungalow am Strand ergattere. Was nit grad s gschiidschte xi isch wiemer indr Nacht hän miese feststelle. Es het nur e chleine Venitalor andr Decki ka und mir hän gschwitzt wie d Säu. I hätt mrs ächt töller vorgstellt..